Менструалниот циклус е важен показател за состојбата на женското здравје и репродуктивна функција. Менструалниот циклус вообичаено може да трае од 21 до 35 дена, а просечниот циклус нормално трае околу 28 дена.
Различни фактори можат да влијаат на неговата должина, а промените во циклусот можат да укажат на одредени здравствени проблеми. Затоа за секоја жена е корисно да ја следи должината на својот менструален циклус.
Должината на менструалниот циклус може да варира од месец во месец поради многу фактори. Хормонските промени играат значајна улога во регулацијата на циклусот. На цикличноста на менструацијата влијаат нивоата на хормоните естроген, прогестерон, LH и FSH, кои варираат во текот на месецот. Така, нивото на естроген постепено расте до средината на циклусот, односно овулацијата.
Прогестерон е главниот хормон на лутеалната фаза. Тој е низок пред овулацијата, а по неа расте и потпомага во одржување на потенцијалната бременост. LH и FSH се неопходни за отпочнување на овулацијата. Одредени промени во нормалните концентрации, како и цикличноста на овие хормони може да ја нарушат должината на менструалниот циклус.
Стресот, како психолошки така и физички, може да предизвика промени на нивоата на овие хормони. Здравствени состојби, како што се полицистични јајници (PCOS) и хипотиреоза, исто така можат да влијаат на редовноста на менструацијата. Возрастa игра улога, особено кај младите девојки и кај жените во предменопауза, кога може да се случат одредени хормонски варијации. На крај, нагли промените во телесната тежина и начинот на исхрана, можат да имаат влијание на циклусот.
Редовен менструален циклус укажува на правилно функционирање на женскиот репродуктивен систем и на тој начин е важен показател за женската плодност. Кратки или продолжени менструални циклуси може да укажуваат на отсуство на овулација.
На пример, жени со нерегуларни циклуси може да имаат потешкотии во забременувањето, бидејќи не се сигурни кога точно во текот на месецот се случува овулацијата. Разбирањето на сопствениот циклус и идентификување на овулацијата може да помогне во подобрување на шансите за зачнување.
Консултација со вашиот лекар е важна ако забележите значителни промени и варијации во должината на менструалниот циклус. Потребно е да побарате помош од вашиот гинеколог доколку циклусот трае помалку од 21 ден или повеќе од 40 дена.
Останати причини да закажете гинеколошки преглед се многу болна менструацијата, која е придружена со необични симптоми, ако имате проблеми со нередовен циклус и потешкотии при забременување.
Должината на менструалниот циклус е важен индикатор за женското здравје и плодност. Ако забележите значителни промени и нередовност во циклусот, важно е да се консултирате со лекар за да добиете соодветна поддршка и третман. Со правилно разбирање и следење на менструалниот циклус, како и редовни гинеколошки контроли можете да го подобрите своето репродуктивно здравје и плодност, и да превенирате сериозни заболувања.
