Стаклестото тело е транспарентна, желатинозна структура која го исполнува просторот помеѓу леќата и ретината на окото. Неговата улога е да ја одржува формата на окото, да обезбеди стабилна поддршка за ретината и да го заштити окото од повреди и оштетувања. Во текот на животот, состојбата на стаклестото тело може да се влоши поради стареење, стрес или недостаток на важни хранливи материи. За одржување на неговото здравје, особено значајни се три материи: колаген, хијалуронска киселина и витамин Ц. Секоја од нив има уникатна улога во заштитата и регенерацијата на овој важен дел од органот за вид.
Колагенот е комплексен протеин, кој ја гради основната структура на стаклестото тело. Тој е неопходен за одржување на неговата форма и за заштита од оштетувања. Колагенот, исто така, е во тесна интеракција со хијалуронската киселина во стаклестото тело, што ја истакнува неговата важност за одржување на структурата на стаклестото тело.
Со природниот процес на стареење, производството на колаген во телото се намалува, што доведува до намалување на цврстината и формирање на честички познати како ‘‘летечки мушички“ (floaters), кои можат да влијаат на квалитетот на видот. Подобрување на синтезата на колаген може да се постигне преку исхрана богата со аминокиселини, од кои најважни се пролин, глицин и лизин. Овие аминокиселини се застапени во месото, јајцата и зеленчукот. Дополнително, додатоците кои содржат хидролизиран колаген се ефикасни за обновување и зајакнување на структурата на стаклестото тело.
Хијалуронската киселина е природен полисахарид од семејството на гликозаминогликани, со висока хидрофилност. Ова значи дека хијалуронската киселина има уникатна способност да врзува големи количини вода, што го одржува стаклестото тело хидрирано и транспарентно. Ова својство е важно за спречување на сувост на окото и зачувување на јасниот вид.
Во стаклестото тело, хијалуронската киселина формира мрежа во која колагенот е рамномерно распореден. Оваа интеракција создава геловидна структура што обезбедува транспарентност, механичка поддршка и еластичност, и му овозможува на стаклестото тело да ги апсорбира надворешните удари и да ги заштити осетливите структури на окото. За да се поттикне природната хидратација, се препорачува исхрана богата со зеленчук, како моркови, авокадо, јаткасти плодови и цитрусни овошја. Додатоците што содржат хијалуронска киселина, исто така, можат да помогнат во одржување на оптималната состојба на стаклестото тело.
Витаминот Ц е еден од најсилните антиоксиданси, кој игра многу важна улога во заштитата на стаклестото тело од оксидативниот стрес. Оксидативниот стрес е резултат на дејството на слободните радикали, кои можат да предизвикаат оштетување на клетките и да доведат до дегенерација на стаклестото тело и другите делови на окото. Витамин Ц, преку неговото уникатно дејство како коензим во процесот на создавање и обликување на структурата на колагенот, е неопходен за одржување на здравјето на стаклестото тело. Природните извори на витамин Ц, како што се киви, портокали, брокула и пиперки, се препорачува редовно да бидат вклучени во исхраната. Доколку е потребно, дополнителен внес на витамин Ц во вид на суплементи може да биде корисно за здравјето на стаклестото тело.
Колагенот, хијалуронската киселина и витаминот Ц се трите главни состојки за одржување на здравјето на стаклестото тело. Тие функционираат синергично за да обезбедат стабилна структура, хидратација и заштита од оштетувања, обезбедувајќи долгорочно зачувување на видот. Со правилна исхрана и доволен внес на овие материи важни за здравјето на вашите очи може да го намалите ризикот од дегенеративни промени на стаклестото тело.
