Остеоартрит е заболување на зголобовите, кое предизвикува хронична болка. Од остеоартрит страда околу 25% од светската популација, а најзасегнати се лицата на средна возраст. Се смета дека неговата зачестеност ќе продолжи да расте во иднина поради стареење на светската популација и зголемување на бројот на лица со прекумерна телесна тежина. Остеоартритот е прогресивно заболување, што значи болката и оштетувањето на зглобовите се зголемува со текот на времето и може да предизвика инвалидитет.
Остеоартрит е болест на мускулно-скелетниот систем при која настанува постепено распаѓање, односно дегенерација на зглобната ‘рскавицата. Истовремено може да настане неправилно создавање на нова коска во вид на остеофити или шилци. Од оваа болест најчесто се зафатени зглобовите на рацете, колената, колковите, стапалата и ‘рбетот.
Постепено губење на зглобната ‘рскавица е дел од нормалниот процес на стареење. Меѓутоа, претходни повреди на зглобовите, вродени аномалии, или одредени спортски активности и професии, кои премногу ги оптоваруваат зглобовите, го забрзуваат овој процес. Прекумерна телесна тежина исто така претставува важен фактор на ризик, бидејќи вишокот килограми предизвикува стрес на колковите, колената и стапалата.
Болка, вкочанетост и тешкотија при движење на зглобовите се симптоми кои може да се појават на еден или повеќе зглобови истовремено. Болката секогаш се влошува при зголемена активност на зглобовите или навечер. Како што напредува болеста, болка може да се појави и при мирување.
Остеоартрит е болест која со текот на времето се влошува, но со примена на одредени методи, симптомите може да се менаџираат. Целта на третманот е да се ублажат болките и квалитетот на животот на пациентите да се подобри. Најважно од се’ е да се постави навремена дијагноза и да се подготви индивидуален план за третман. На овој начин може да се забави напредокот на болеста.
Покрај тоа, се препорачува одржување на нормална телесна тежина и редовна физичка активност која не ги оптоварува зглобовите. Доколку остеоартритот е во својата крајна дегенеративна фаза единствен третман е оперативен зафат, каде оштетениот зглоб се заменува со вештачки, односно со протеза. По операцијата се препорачува физикална терапија и рехабилитација со цел пациентите што побрзо и побезболно да се вратат на своите секојдневни активности.
Остеоартрит е хронична болест која значајно го нарушува квалитетот на животот, но со рана дијагноза и правилен третман, болката може да се менаџира и напредокот на болеста да се забави. Одржување на здрава телесна тежина, физичка активност и навремен медицински третман се клучни за подобрување на животната состојба на лицата кои страдаат од остеоартрит.
